Niejs & Persberichte
Tips, opmerkinge of niejtjes: laot 't ôs weite
"Tegels Blood... Det is pas good!"
| Tegels Blood is verbônge aan: |
|
Vastelaovend 2010
D’n tiëd tösse d’n 11de van d’n 11de en d’n Prinsebal is relatief kort maar deurt vur minnig-ein te lang. De lange vastelaovesdaag dao-en-taege deure wir te kort.
Vastelaoves dinsdaag, ‘t letste muziekblok wuerd ingezatte; en den en block gesjtop, de vastelaovend 2010 zit d’r op. Trük kiékend kenne weej sjtelle det ouch deze vastelaovend wir gesjlaag waar. Naeve ’n aantal min of miér verplichte optraejes, vormde ’t prinsebal en de optraejes in “Vastelaovespaviljoen ’t Witte hoes” toch de hoëgtepunte. Gans in ’t thema van van dit jaor ’’’t klingk wie ’n klökske” sjtinge weej ôs menke in daen groëte Haandertzaal beej ‘t prinsebal.
D’n vriedaag daor nao volgde de interne lintjesraegen van de jeugprins en bezeuke aan de vastelaovesbals beej TSC’04 en Spcl. Irene. Det beej det letste bezeuk ’n sjuuf ‘n vluch van inkele maeters naor ônger makde waar effe minder prettig. Per saldo haesse toch instrumente nuëdig um muziek te kenne make. Gelökkig veel de sjaai achteraaf mei-j. Nao ’t inhaole van de Prins waar de volgende muzikale halte de receptie van d’n Oelesjeugprins. Ôndanks det de bezetting qua aantal minder waar woort ouch dao ein gooj prestatie neergezatte. Op 9 fibberwari raegende ‘t lintjes beej d’n Oelesprins in ’t Zaelke. Dônderdigs vur de vastelaoves sjting ’t Sjtadsdeiltreffe in ôs aad gemeintehoës op ’t programma. As plaetje bes waal ’n imposant gezich met allemaol die mutse (en krage). D’n vriedaag vur d’n vastelaovend belaofde drök te waere. Iërs um 13.00 oor naor Horst toe naor de SBO sjoël “de Peelhorst” um dao vur die kinger, in eurem optoch door Horst, te blaoze. Det haet de kepel in idder geval vuël positieve publiciteit opgeleverd. Det beej gebrek aan Horster muziek, ’n Tegelse kepel vur die kinger kwaam blaoze woort ziër gewaardeerd. Um 17.00 oor ’t twiëde optraeje vur ’n personeelsvereiniging in ’t Venlose. Met ’t aete nag werm achter de teng vervolges wir richting Tegele naor de tent woë de aöpening van d’n vastelaovens waar. Praktisch alle Tegelse Joekskepelle waare daobeej aanwezig en leete zich van eurem beste kangk zeen. Vastelaoveszaoterdaag waar de nach van de kloon. Dreej kiër waar d’r ’n optraeje vur ôs gepland. Op zôndig volgde de prinsereceptie van d’n Oelesprins Luuk. Netuurlik wilse as Oeleskepel den ouch ’n waordje toét dem Oelesprins met zien twieje adjudante richte. Jaomer det Joekskepel Sôkkerpaek mende ônger daen sjpeech veural hel door te môtte blieve sjpeule….
Vastelaovesmaondig gen verplichtinge richting kepel. Krachte kôste gesjpaard waere vur d’n volgende daag. Nao de receptie beej ’t Boerebroedspaar sjting de Fakkeloptoch en ’t aaftraeje van iërs de jeugprins en sjnachs um 24.00 oor van d’n Oelesprins op ’t programma. Vur d’n letste kiër meugde de twieje prinse in de waan verkiëre det d’r nag noëts zo’n gooje ware gewaes. Ein gans jaor langk meuge ze die illusie höbbe um d’r ’t volgend jaor achter te kômme det ouch det maar tiédelikke sjiën waar. De letste noëte woorte d’r oét gepers. Aswoensdaag waar al ’n half oor aad wie ôs muzikale klangke versjtomde; ’n letste glaeske…’t is good gewaes. ‘t waar wir ‘nne sjoëne vastelaovend.
Jean
