Niejs & Persberichte
Tips, opmerkinge of niejtjes: laot 't ôs weite
"Tegels Blood... Det is pas good!"
| Tegels Blood is verbônge aan: |
|
Oeleskepel Tegels Blood naor de Weihnachtsmarkt te Köln.
Alwir vur d’n 10 kiér sjting ’t jaorlikse bezeuk aan de Körsmert te Köln op ’t programma.
Nao ’nne vurtreffelikke Italiaans getinte brunch beej de besjermhiër thoés, toog Tegels Blood vur d’n 10de kiér richting Köln. In taegesjtelling wies de letste jaore met geweldig waer; genne sjnië en genne vors. Nao ’n vursjpoedige reis sjtelde de kèpel zich maar direk op de plaats op woë gen gelazer met de stuard te verwachte waar. Gôjje gok dôchte weej maar det leep toch wir net iets angers. Nao inkele klassiekers wie Stille Nacht en I’m dreaming woort ’t populairdere repertoire aopegetrôkke en “Ging’s loss”.
Sjeeds voller woort ’t plein naeven d’n Dom en de minse genote zichbaar van ôs optraeje. Wies det de woute kwame. Wat waar d’r aan de hangk. Op de körsmert sting ’n kiosk woërop diverse artieste d’n gansen aovend optraeje. Ôs “show” haaj kennelik zo’n aantrekkingskrach op ’t publiek det de organisatie niks angers euver bleef um ôs kepel ’t zjwiége op te legke. Eur artieste sjtinge vur ’n laege ambiance te sjpeule. Op zich nag neet z’n probleem maar ’t massaal toegesjtuimde publiek dôch dao toch effe angers euver. Sjpontaan klonk ’t “Zugabe, Zugabe” oét honderde kaele. De verwinsinge die die deenders naor de kop gesjlingerd kreege zal ich heej maar weg laote. Netuërlik vulse dich gevleid maar ’t kwaam ôs ouch neet ôngelaege want weej meusde uëterlik um hallef nege in ôs home “Bierbrauhaus En d’r Salzgass” optraeje. De klok goof al 20.15 oor aan….en ’t waar toch nag zeker 10 minute laope.
D’n ôntvangs dao waar wir geweldig. Sjteeds miër bekende treffe weej dao allewiels aan. ‘t Aantal groepe bezeukers die iërs informere of “die Kapelle wieder kommt” en den reserveren wuerd grötter. Beej d’n oetbater kenne weej kennelik ’n pötje braeke. Sjpontaan woort ôs aangebaoje op ’t buffet plaats te nemen! En weej maar altied gedôch höbbe det ’t buffet in Prüuses heilig waar. Vur de res augde alles as wie vertrouwd. Allein Frau Director vom Sanitair haaj ’n assistente gekrege. Met ôs op Köln toegesjneeje repertoire kreege weej de sjtumming d’r vlot in. Met “Unser Stammbaum, Du bess die Stadt en Viva Colonia” um d’r ’n paar te numme, kriese ilke Kölner op dien hangk.
Aan ôs vaste fans kôsde wir de nuëdige Opsjtaekers gesjleete waere, de bruëdjes sjmakde vurtreffelik en ’t Kölsch waar wie van aads. Allein beej ’t aafsjied tracteerde de ganse boed ôs dit kiér op ‘n prachtig a capella gezônge “Bye, bye my love”. Inmiddels waar ’t alwir zôndig. Op d’n waeg trük naor de bös nag volop bedrievigheid in dees sjtad. Letste metro’s en/of treine etc. meusde nag gehaold waere. Weej alle tooge met’n good geveul richting bös en naor hoës. Um hallef dreej zoot ouch dees toch d’r wir op.
Jean
