Niejs & Persberichte
Tips, opmerkinge of niejtjes: laot 't ôs weite
"Tegels Blood... Det is pas good!"
| Tegels Blood is verbônge aan: |
|
Wiénfiëste Saarburg 2011
“t iérste weekend van september sjeit beej de kepelleeje al hiel vrüeg vaolgeboek; Wiénfiëste te Saarburg. Dit jaor alwir vur d’n achste kiér op riej. Wiesse ’t ouch kiérs of wends, good waer is daobeej essentieel. De vurroétzichte ware neet ongunstig maar deze zomer wetse ’t maar noëi-jts.
Op dreej aafzegginge nao (en eine naokômmer) vertrok daen vriedaagmiddaag um kwart vur zeve de kepel richting Saarburg. Normaal gesjraoke duurt zo’n reis um en um 3 1/2 oor; deze kiér diék 4 oor zônger aanwiesbare raeje. Daomei looge weej al direck achter op ’t vaste programma. Det hilt in; settele in de sjporthal en hups op naor ’t idyllische centrum van Saarburg. Van ’t beoogde café det weej den aandoon, ligk de veurdeur 10 maeter hoëger den de achterdeur. Op creatieven wiés haet men dao gebroek gemak de grille van mooder natuur. Maar mooder natuur
haet dao ouch “prutswerk” geleverd….
As den nao dreej rundjes de onheilstijding kump det ’t vaat laeg is en men wil euversjtappe op fleskes beer, frons minnigein de wingkbrauwe. Den maar trük naor de sjporthal en naor bed.
Op ’t sjtüpke van de sjporthal nag get naoklassjonere en um kwart euver dreej ging de deur op sjlaot.
Rôngk de klok van half ach kwaam d’r alwir laeve in de boet; ’n vaal zunke deej vermoede det ’t met ’t waer daen daag waal good zoél zitte. Iérs naor Hotel Jungblut (vur ‘nne inkele ingewiéde ouchwaal Hotel Joosten) woë dit kiér ein vurtreffelijk buffet klaorsjting. De sjtad Trier waar de volgende halte. Ônger ‘nne sjtraolende hemel op ’n plein met volle terrasse, vermakde weej de aanwezige. Aangezeen weej zoë flexible zién wie ’n tuinsjlang waar ’t ouch gen probleem um tösse de bedriëve door effe de aöpening van ’n sjoonzaak muzikaal op de fleure. En det vur ‘nne appel en gen ei.
Nao Trier trük naor Saarburg woë weej maar ves d’n aaftrap van ’t wiénfiës deeje. Dao sjloot ôzze nieje veurzitter Cor (d’n ierder aangehaolde naokômmer) zich aan beej de meute. Soms geit ’t werk vur de kepel…
Aansjloetend naor ’t recreatiepark baoven op d’n berg woë weej ’n aete aangebaoje kreege van de plaatselijke Landal organisatie. Nag effe de bein sjtrekke en toen trük naor de Altstad woë, mei door ’t gooje waer, doézende minse op ’t wiénfiës waare aafgekômme. En den bliek al gauw desse toch al minnig jaor te gas bus in Saarburg. Det minse ôs al diverse jaore höbbe zeen en hüere sjpeule wuerd miér den ens düdelik gemak. Alom positieve reacties. Van alle kwats dae dao door de kepel zelf gemak en verkoch wuerd, zal ich hae maar verder zjwiége. Al met al waar ’t wir ‘nne hiéle gezelligen aovend. Op enig mement wuerd aangegaege det d’r get leeje müeg waere en den is ‘t inpakke en trük naor “hoes”. Volges vas gebroëk wuerd daen aovend op ‘t stjüpke veurtgezatte, Daorum nag gauw effe get flesse wiën ingesjlage.
De sjtüpkes-meeting kreeg dit jaor ’n bizônger tintje umdet dao mettersant de organisatie Aövendje Joeks in de sjeigers gezatte woort….. Um 4.15 oor ging de deur op sjlot.
Zôndig waar ’t al wir vrüeg daag. Vur de letse kier ônger daen douch met water der qua temperatuur met bergwater te vergeliéke is. In wieverre det det toét ’n sjrikreactie leidde weite we neet maar toen we vur de deur van “os hotel Jungblut (resp. Joosten) te hüere krege al speulend naor binnen te trekke, protesteerde minnige lip. Ein noei-jts ierder vertolkte versie van de Festwiespolka waar ’t gevolg. Makde per saldo ouch niks oët umdet de achterliggende gedachte (van d’n oétbater waalteversjtaon) van det blaoze waar: minse wakker kriege. Det is ôngetwiefeld gelök.
Beej Landal haaj ’t aete ôs good gesjmak. Daorvuer meuste weej waal op zôndigmorge nag effe komme blaoze. ‘n gooje gelaegenheid wir op temperatuur te kômme. Vervolges wir de bös in (weej sjeeze get aaf in zo’n weekend) en trük naar ’t centrum van Saarburg woë weej in aafwachtring van d’n “Weinumzug” ôs muzikaal potentiel leete hüere.
In taegensjettling toét vurrig jaor wis de organisatie te vurkômme det weej d’r op ’t krüetspunt een zootje van makde. Dus waar d’r maar ein oplossing; achter de pliessiewage aan meilaope naor de Altstad woë ’t wienfiës zien vervolg haaj. Maar det leep efkes angers. D’n optoch waar d’r eine van 5 maeter vuroét, sjtilsjtaon; 5 maeter vuroét etc. Op enig moment passerde weej ‘t commandocentrum van de organisatie woë de sjpraeksjtalmeister ôs begroete met “Da sind sie ja endlich, unsere freunde aus den Niederlande” en nog allerhande lovende wäord. Mark kreeg ’n wiénke in de hangk gedrök en toen ging ’t nag eine kiér richtig loos. “Einer geht noch, einer geht noch rein” klonk het steeds weer….. De minse woorte sjteeds enthousiaster maar op enig moment is ’t den toch gedaon.
Det waar effe kikke. Geweldig. In de Altstad de letse culinaire sjtop gemak en vervolges inpakke, de bös in en wir richting Tegele. Deze kiër deurde de reis dreej oor. Of de touch ein sjtreek van nauurtikke misteries is… wae zal ’t zegke.
Met z’n alle kenne weej wir trük kiéke op ein gesjlaag weekend, zeker asse bedingks det ’t weekend daoveur, as gevolg van hoosbuuje met centimaetersgroëte hagelstein, wingkhooze etc. in de regio ’n sjaai-j van miér den 30 miljoen woort aangezich…
Jean
